ശനിയാഴ്ച ഇറങ്ങുന്ന വിമാനത്തില്‍ 119 പേരുണ്ടാകും. രാത്രി പത്ത് മണിയോടെ അമൃത്സറില്‍ ഇറങ്ങുമെന്നാണ് പ്രതീക്ഷിക്കുന്നത്. ഇതില്‍ 67 പേരും പഞ്ചാബില്‍നിന്നു തന്നെയുള്ളവരാണ്. 33 പേര്‍ ഹരിയാനയില്‍നിന്നും എട്ടു പേര്‍ ഗുജറാത്തില്‍നിന്നും മൂന്നു പേര്‍ ഉത്തര്‍ പ്രദേശില്‍നിന്നും രണ്ടു പേര്‍ വീതം ഗോവ, മഹാരാഷ്ട്ര, രാജസ്ഥാന്‍ എന്നിവിടങ്ങളില്‍നിന്നും, ഓരോരുത്തര്‍ ഹിമാചല്‍ പ്രദേശില്‍നിന്നും ജമ്മു കശ്മീരില്‍നിന്നുമാണ്.
ഞായറാഴ്ച എത്തുന്ന വിമാനത്തിലെ യാത്രക്കാരുടെ വിവരങ്ങള്‍ ഇനിയും വ്യക്തമായിട്ടില്ല.
പ്രധാനമന്ത്രി നരേന്ദ്ര മോദി യുഎസ് പ്രസിഡന്‍റ് ഡോണല്‍ഡ് ട്രംപുമായി നേരിട്ട് കൂടിക്കാഴ്ച നടത്തിയതിനു പിന്നാലെയാണ് അടുത്ത രണ്ടു ബാച്ച് നാടുകടത്തലുകളുടെ വിവരം പുറത്തുവരുന്നത്. സാധാരണ കുടുംബങ്ങളില്‍നിന്നുള്ളവര്‍ക്ക് വലിയ സ്വപ്നങ്ങള്‍ നല്‍കി മനുഷ്യക്കടത്തുകാര്‍ വലയില്‍ വീഴ്ത്തുന്ന പ്രവണതയ്ക്കെതിരേ പോരാട്ടം നടത്തണമെന്ന് മോദി ട്രംപിനോടുള്ള ചര്‍ച്ചയില്‍ വ്യക്തമാക്കിയിരുന്നു.
അനധികൃത കുടിയേറ്റവും മനുഷ്യക്കടത്തും ഇന്ത്യയെ മാത്രം ബാധിക്കുന്ന പ്രശ്നമല്ലെന്നും ആഗോള പ്രതിഭാസമാണെന്നുമുള്ള നിലപാടാണ് ട്രംപുമായുള്ള ചര്‍ച്ചയില്‍ മോദി സ്വീകരിച്ചത്. അനധികൃതമായി ഒരു വിദേശരാജ്യത്ത് പ്രവേശിക്കുന്ന ഒരാള്‍ക്കും അവിടെ താമസിക്കാന്‍ ഒരവകാശവുമില്ലെന്ന നയവും മോദി വിശദീകരിച്ചിരുന്നു.
ട്രംപ് അധികാരമേറ്റ ശേഷം ഇന്ത്യന്‍ അനധികൃത കുടിയേറ്റക്കാരുമായുള്ള ആദ്യ യുഎസ് സൈനിക വിമാനം ഫെബ്രുവരി അഞ്ചിനാണ് അമൃത്സറില്‍ ഇറങ്ങിയത്. ഇതില്‍ വന്ന യാത്രക്കാരുടെ കൈകളില്‍ വിലങ്ങ് വയ്ക്കുകയും കാലുകളില്‍ ചങ്ങല ബന്ധിക്കുകയും ചെയ്തിരുന്നു എന്ന ആരോപണം പാര്‍ലമെന്‍റില്‍ ഉള്‍പ്പെടെ രാജ്യത്ത് വലിയ ചര്‍ച്ചാവിഷയമായിരുന്നു.
തുടര്‍ന്ന്, അനധികൃത കുടിയേറ്റക്കാരെ നാടുകടത്തുന്നതോ വിലങ്ങ് വയ്ക്കുന്നതോ പുതിയ കാര്യമല്ലെന്ന് വിദേശകാര്യ മന്ത്രി എസ്. ജയശങ്കര്‍ പാര്‍ലമെന്‍റില്‍ നടത്തിയ പ്രത്യേക പ്രസ്താവനയില്‍ വ്യക്തമാക്കിയിരുന്നു. എന്നാല്‍, നാടുകടത്തപ്പെടുന്നവരോടെ മനുഷ്യത്വരഹിതമായി പെരുമാറാന്‍ പാടില്ലെന്ന് യുഎസിനോട് ആവശ്യപ്പെട്ടിട്ടുള്ളതായി മോദിയുടെ യാത്രയ്ക്കു മുന്‍പ് വിദേശകാര്യ മന്ത്രാലയം അറിയിക്കുകയും ചെയ്തിരുന്നു.
Comments: